5 ay öncə Tufandağı istiqamətində itkin düşən alpinistlərin meyitinin tapıldığı deyilir. Fövqəladə Hallar Nazirliyinin (FHN) yaydığı məlumata görə, axtarışlar nəticəsində mayın 16-da, saat 18 radələrində axtarış işlərinin aparıldığı ərazidə təqribən 4 m dərinlikdə alpinistlərə aid çadırın yeri müəyyən edilib və ilkin olaraq 1 kişi meyiti aşkar edilib. Saat 19 radələrində isə daha bir kişi və qadın cəsədi aşkarlanıb.

Dekabrın 27-də "Gilavar" Hava və Ekstrim İdman Klubunun üzvləri Cəbrayılzadə Fəridə Zəbiyulla qızı, Hüseynov Babur Vaqif oğlu və Bünyatzadə Namin Nizami oğlu 2017-ci il dekabrın 23-də Quba rayonunun Xınalıq kəndindən Tufandağı istiqamətində yürüşə çıxaraq geri qayıtmayıblar. Alpinistlərin axtarışı ilə bağlı işlər aparıldığı deyilsə də, ötən müddət ərzində onlardan heç bir xəbər almaq mümkün olmamışdı.

 ++++++++ 

Quba rayonunda itkin düşmüş alpinistlərin meyiti helikopterlə Bakıya göndəriləcək. "Report"un Şimal bürosunun məlumatına görə, onların meyiti müayinə olunmaq üçün Səhiyyə Nazirliyi Məhkəmə-Tibbi Ekspertiza və Pataloji Anatomiya Birliyinə təhvil veriləcək.